გერმანიის პოლიციამ და პროკურატურამ დაიწყეს პოლიტიკოსებზე თავდასხმის კიდევ ორი ფაქტის გამოძიება. გერმანული მაუწყებლის, DW-ს ინფორმაციით, 7 მაისს ბერლინის ერთ-ერთ ბიბლიოთეკაში მყოფ სოციალ-დემოკრატ ფრანცისკა გიფაის, რომელსაც ეკონომიკის საკითხებში სენატორის სტატუსიც აქვს, მამაკაცმა თავში ჩაარტყა მძიმე საგნიანი ჩანთა. 46 წლის პოლიტიკოსი თავის და კისრის ტრავმით საავადმყოფოში გადაიყვანეს. თავდამსხმელი შემთხვევის ადგილიდან მიიმალა. ჯერჯერობით უცნობია, შეძლო თუ არა ბერლინის პოლიციამ ძებნილი ეჭვმიტანილის დაკავება. იმავე დღეს ქალაქ დრეზდენში თავს დაესხნენ პოლიტიკოს ქალს, „მწვანეთა პარტიის“ წევრს, რომლის ვინაობას სამართალდამცავები არ ასახელებენ. 47 წლის ქალი მხარდამჭერებთან ერთად საარჩევნო პლაკატებს აკრავდა. მას ფიზიკური და სიტყვიერი შეურაცხყოფა მიაყენეს ახალგაზრდა მამაკაცმა და ქალმა. პოლიციამ ორივე დააკავა. გასულ კვირაში გერმანიის სხვადასხვა რეგიონში პოლიტიკოსებზე რამდენიმე თავდასხმა მოხდა. 3 მაისს ქალაქ დრეზდენში სცემეს ევროპარლამენტის დეპუტატობის კანდიდატს, 41 წლის სოციალ-დემოკრატ მატიას ეკეს, რომელიც თავის საარჩევნო პლაკატებს აკრავდა. პოლიციის ინფორმაციით, დაკავებულია თავდასხმის მონაწილე 17 წლის ბიჭი და იდენტიფიცირებულია კიდევ სამი, 17-18 წლის ეჭვმიტანილი. ყველა მათგანი გერმანიის მოქალაქეა. გერმანიის კანცლერმა ოლაფ შოლცმა თავდამსხმელთა ქმედებას უწოდა „საფრთხე დემოკრატიისთვის“ და განაცხადა, რომ ძალადობას ერთად უნდა დაუპირისპირდნენ. 4000-ზე მეტი გერმანელი პოლიტიკოსის ხელმოწერით გამოქვეყნდა მიმართვა, რომელშიც მატიას ეკეზე თავდასხმა შეფასდა დარტყმად ყველა პოლიტიკოსსა და დემოკრატიაზე. პოლიტიკოსებზე თავდასხმების გახშირების გამო, 7 მაისს საგანგებო სხდომა გამართეს გერმანიის ფედერალური მიწების შინაგან საქმეთა მინისტრებმა. მათ მხარი დაუჭირეს პოლიტიკოსების დაცვის გაძლიერებას და სისხლის სამართლის კოდექსის გამკაცრებას. ...