რესტორნების შიდა სივრცეების გახსნის შესახებ მიღებული გადაწყეტილების თაობაზე პრემიერ-მინისტრმა ირაკლი ღარიბაშვილმა საკოორდინაციო საბჭოს სხდომის დასრულების შემდეგ განაცხადა. მისი განმარტებით, რესტორნები შიდა სივრცეებში ფუნქციონირებას განაახლებენ შაბათ-კვირის გარდა ბათუმში 1 მარტიდან, ხოლო დანარჩენ საქართველოში - 8 მარტიდან. ძალაში რჩება 21 საათიდან დილის 5 საათამდე გადაადგილებაზე დაწესებული შეზღუდვა. ეკონომიკის მინისტრის ნათია თურნავას განცხადებით, რესტორნებს მკაცრი რეგულაციების დაცვა მოუწევთ. „გვესმის ძალიან კარგად სარესტორნე ინდუსტრიის, მაგრამ უნდა აღვნიშნო, რომ ეს [გახსნა] მოხდება ძალიან მკაცრი მონიტორინგის ქვეშ, ძალიან სამართლიანად არის მიჩნეული დღემდე მთელ მსოფლიოში, რომ რესტორნები წარმოადგენს ერთ-ერთ მნიშვნელოვან ე.წ. ბუსტერს, მაღალი მობილობის მაგენერირებელ სფეროს, სადაც ინფიცირების საფრთხე არის მაღალი, შეუძლებელია პირბადის გამოყენება. აქედან გამომდინარე, ჩვენ ძალიან მკაცრად დავაკვირდებით, თუ როგორ მიდის აქ პროტოკოლების შესრულება“, - განაცხადა ნათია თურნავამ. მისი სიტყვებით სარესტორნე სფეროს წარმომადგენლებთან გამართული შეხვედრებიდან ჩანდა პასუხისმგებლიანი მიდგომა, რომ ე.წ. სოცილუარი ღონისძიებები (ქორწილი, ქელეხი და ა.შ.) არ ჩატარდეს, რადგან ამ თვალსაზრისით შეზღუდვები რჩება. ნათია თურნავას განმარტებით, შაბათ-კვირას არსებული შეზღუდვების მოხსნის საკითხზე ეპიდემიოლოგიური სიტუაციის და შეზღუდვების მოხსნის შედეგების გაანალიზების საფუძველზე იმსჯელებენ. რესტორნების გარე სიცრცეები 15 თებერვლიდან გაიხსნა. ძალაში რჩებოდა შაბათ-კვირას არსებული შეზღუდვა. საქართველოში რესტორნები და კაფეები სტუმრებისთვის დაკეტილია 2020 წლის ნოემბრის ბოლოდან. კვების ობიექტები გატანა-მიტანის წესით მუშაობენ. ...