6 იანვარს კაპიტოლიუმზე იერიში, როცა საპროტესტო აქციის წარმომადგენლები კონგრესის შენობაში შეიჭრნენ, როგორც ჩანს, კოორდინირებული და წინასწარ მომზადებული აქცია იყო. ამის შესახებ კონგრესში გამართულ მოსმენაზე განაცხადეს კონგრესის უსაფრთხოების უზრუნველყოფისთვის პასუხისმგებელი პოლიციისა და სხვა სამსახურების ხელმძღვანელებმა. კაპიტოლიუმის პოლიციის ყოფილი ხელმძღვანელის, სტივენ სუნდის თქმით, თავდამსხმელებს თან ჰქონდათ სპეციალური საშუალებები: ალპინისტური აღჭურვილობა, ქიმიური აეროზოლები, ასაფეთქებელი მოწყობილობები. მისი თქმით, პოლიციის ჯაჭვის პერიმეტრის მოშორებულ წერტილებში ორი თვითნაკეთი ბომბი ააფეთქეს, რათა კაპიტოლიუმის შენობიდან გადაეტანათ პოლიციელების ყურადღება. FBI-ის მიერ წარმოებული გამოძიების წინასწარი შედეგები მოწმობს, რომ თავდასხმასთან კავშირი ჰქონდათ მემარჯვენე ექსტრემისტულ ჯგუფებს Oath Keepers-სა და Proud Boys-ს, განაცხადა სენატის საშინაო უსაფრთხოების კომიტეტის თავმჯდომარემ, გერი პიტერსმა. კონგრესის უსაფრთხოებისთვის პასუხისმგებელი სამსახურების ხელმძღვანელები აცხადებენ, რომ ფედერალური სადაზვერვო სამსახურებისგან არ მიუღიათ კაპიტოლიუმზე ასეთი თავდასხმის შესაძლებლობაზე გაფრთხილება. ეს კონგრესში ამ თემაზე გამართული პირველი მოსმენა იყო. 6 იანვარს თეთრ სახლთან გამართული მიტინგის შემდეგ, რომელშიც აშშ-ის ყოფილი პრეზიდენტი დონალდ ტრამპი მონაწილეობდა, მისი რამდენიმე ასეული მხარდამჭერი შეიჭრა კონგრესის შენობაში, რათა ხელი შეეშალა საპრეზიდენტო არჩევნებში ჯო ბაიდენის გამარჯვების დამტკიცების პროცესისთვის. რამდენიმე დღის შემდეგ წარმომადგენლთა პალატამ დონალდ ტრამპს იმპიჩმენტი გამოუცხადა ამბოხების წახალისების ბრალდებით, მაგრამ სენატმა ის გაამართლა. ეს პრეზიდენტ ტრამპის მეორე იმპიჩმენტი იყო. ...