Associated Press-ის ცნობით, ღაზის სექტორის სამხრეთში მდებარე ქალაქ რაფაჰზე ისრაელის დარტყმების შედეგად წუხელ დაიღუპა 13 ადამიანი, მათ შორის ცხრა ბავშვი. ისრაელი თითქმის ყოველდღე ახორციელებს საჰაერო რეიდებს რაფაჰის წინააღმდეგ, სადაც ამჟამად ღაზის სექტორის 2,3-მილიონიანი მოსახლეობის ნახევარზე მეტი იმყოფება. ძირითადად ეს არიან ადგილნაცვალი პირები, რომლებმა სხვა რეგიონებში მიმდინარე საბრძოლო მოქმედებებს გაარიდეს თავი და რაფაჰს მიაშურეს. მიუხედავად იმისა, რომ ისრაელს საერთაშორისო თანამეგობრობა, მათ შორის შეერთებული შტატები, თავშეკავებისკენ მოუწოდებს, მან პირობა დადო, რომ გააფართოებს ეგვიპტის საზღვარზე მდებარე რაფაჰის წინააღმდეგ სახმელეთო იერიშს. ასევე ნახეთ ღაზის სექტორის ქალაქ რაფაჰში ისრაელის სარაკეტო დარტყმას ემსხვერპლა ცხრა ადამიანი, მათ შორის - ექვსი ბავშვი გუშინ აშშ-ის წარმომადგენელთა პალატამ დაამტკიცა საერთაშორისო დახმარების პაკეტი, რომელშიც შედის 26 მილიარდი დოლარი ისრაელისთვის. აქედან 9 მილიარდი დოლარი განკუთვნილია ღაზის სექტორში ჰუმანიტარული დახმარებისთვის. ღაზის ომმა ჩრდილში მოაქცია უწყვეტი ძალადობა მდინარე იორდანეს დასავლეთ ნაპირზე, მათ შორის რეგულარული ჯარების რეიდები შეიარაღებული მებრძოლების წინააღმდეგ, ებრაელ ახალმოშენეთა მიერ პალესტინური სოფლების დარბევა და ქუჩებში პალესტინელთა თავდასხმები ისრაელელებზე. ისრაელი მეშვიდე თვეა აგრძელებს ღაზის სექტორზე იერიშს. ომი დაიწყო მას შემდეგ, რაც 7 ოქტომბერს პალესტინურმა რადიკალურმა დაჯგუფება ჰამასმა (აშშ-სა და ევროკავშირში ტერორისტულ ორგანიზაციად არის მიჩნეული) სამხრეთ ისრაელში თავდასხმა განახორციელა და დახოცა 1200-ზე მეტი ადამიანი. 240-მდე მძევლად წაიყვანა ღაზაში. მათი ნაწილი ჯერ კიდევ ტყვეობაშია. ვარაუდობენ, რომ ნაწილი ცოცხალი აღარაა. ღაზის სექტორის ჯანდაცვის სამინისტროს თანახმად, რომელსაც ჰამასი აკონტროლებს, ისრაელის იერიშების შედეგად შარშან შემოდგომიდან დღემდე დაღუპულია 34 ათასზე მეტი ადამიანი. მათ უმრავლესობას ქალები და ბავშვები შეადგენენ. ...