ქუთაისში, ლადო მესხიშვილის სახელობის თეატრში, დღეს დაიწყო კონსტიტუციაში ლგბტ უფლებების შემზღუდველი ნორმის შეტანის შესახებ საკონსტიტუციო განხილვები. ცვლილების ინიციატორი მმართველი პატია „ქართული ოცნებაა“. განხილვები ჰომოფობიური განცხადებების ფონზე მიმდინარეობს, რასაც მმართველი პარტიის წარმომადგენლები ღიმილით ხვდებიან. საყოველთაო განხილვის საორგანიზაციო კომისიის წევრები საპარლამენტო უმრავლესობიდან არიან პარლამენტის თავმჯდომარე შალვა პაპუაშვილი, საპარლამენტო უმრავლესობის ლიდერი მამუკა მდინარაძე, იურიდიულ საკითხთა კომიტეტის თავმჯდომარე ანრი ოხანაშვილი, ჯანდაცვის კომიტეტის თავმჯდომარე ზაზა ლომინაძე, ასევე - დავით მათიკაშვილი, თენგიზ შარმანაშვილი, ბაია კვიციანი; ოპოზიციიდან კი - ევროპელი სოციალისტების წევრი ფრიდონ ინჯია. „დარწმუნებული ვარ, რომ ოპოზიციის რადიკალური ჯგუფების მხრიდან ეს კანონი მხარდაჭერილი არ იქნება, რადგან მათი ალიანსი და ამ სეგმენტჯგუფის, რომელსაც ე.წ. პიდარასტების სეგმენტი ჰქვია და წარმოადგენენ მიტინგზე ოპოზიციასთან ერთად სიყვარულს“... - თქვა ხარაგაულის მერმა კობა ლურსმანაშვილმა. მისი სიტყვით გამოსვლის დროს მამუკა მდინარაძე იღიმოდა, შალვა პაპუაშვილმა კი თქვა, რომ „კორექტულები იყვნენ გამონათქვამებში“. შეხვედრას ესწრებოდნენ: იმერეთის მერები, საკრებულოს წევრები, სამსახურების წარმომადგენლები, პარტიის ახალგაზრდული ორგანიზაციების წარმომადგენლები. renderExternalContent("https://www.youtube.com/embed/sNl1THlHgx4?&&&fs=1&enablejsapi=1") ლგბტ უფლებების შემზღუდავი კანონპროექტები საპარლამენტო უმრავლესობის ლიდერმა მამუკა მდინარაძემ 25 მარტს წარუდგინა ჟურნალისტებს. ამ ცვლილებების მიღების შემთხვევაში მნიშვნელოვნად შეიზღუდება ლგბტ პირთა უფლებები. კერძოდ: არასრულწლოვანის შვილად აყვანა შეეძლება ქორწინებაში მყოფ ოჯახს (ქალსა და კაცს) ან ჰეტეროსექსუალ ადამიანს; აიკრძალება სქესის შეცვლასთან დაკავშირებით ნებისმიერი სამედიცინო ჩარევა; აიკრძალება იმგვარი შეკრებები და პროგრამების ან მასალების გავრცელება, რომლებიც ერთნაირსქესიანი წყვილის ან სქესის შეცვლასთან დაკავშირებული სამედიცინო ჩარევის „პოპულარიზაციისკენ არის მიმართული“. ასევე ნახეთ „ქართულ ოცნებას“ ლგბტ უფლებების შესაზღუდად კონსტიტუციის შეცვლა უნდა მმართველ პარტიას მოქმედ პარლამენტში საკონსტიტუციო ცვლილებების მისაღებად საკმარისი ხმები არ აქვს, თუმცა პროექტის საყოველთაო განხილვები მაინც დაიწყო. დეპუტატები მოსახლეობასთან შეხვედრას აპირებენ ამბროლაურში - 23 აპრილს, ოზურგეთში - 24 აპრილს, ბათუმში - 25 აპრილს, ზუგდიდში - 26 აპრილს, მესტიაში - 27 აპრილს. ...