ლაგოდეხის მუნიციპალიტეტის სოფელ მაწიმში, რომელიც საქართველოს უკიდურეს აღმოსავლეთ ნაწილში მდებარეობს, ბერიაშვილების ოჯახში, საკანალიზაციო ჭის გათხრის დროს, სამი მეტრის სიღრმეში ქვევრი იპოვეს. ქვევრს თავზე ეხურა კლდის ნამტვრევი ქვა. ბერიაშვილებმა რადიო თავისუფლებას უთხრეს, რომ ჭას მძიმე ტექნიკით (ტრაქტორით) ჭრიდნენ, რა დროს მტვრევის ხმა გაიგეს. მალევე ნახეს, რომ მიწის სიღრმეში ქვევრი იყო. „უკვე შებინდებული იყო ტექნიკა რომ მუშაობდა... დღის სინათლე, რომ ყოფილიყო ალბათ ქვევრი არ დაიმტვრეოდა. შესაბამის სამსახურებს გავაგებინეთ, მოვიდნენ ნახეს და გვითხრეს, რომ რამდენიმე დღეში ადგილზე სპეციალისტები მოვლენ; დეტალურად შეისწავლიანო. ვარაუდობენ, რომ ეს უნდა იყოს ადრე ფეოდალური ხანის პერიოდის“, - უთხრეს რადიო თავისუფლებას ბერიაშვილებმა. სოფელ მაწიმში აღმოჩენილი ქვევრი. ადგილზე ჭის გათხრის სამუშაოები შეჩერებულია. ქვევრის ნამტვრევები ისევ ადგილზეა. რადიო თავისუფლებას ლაგოდეხის მხარეთმცოდნეობის მუზეუმის ხელმძღვანელმა დავით ყვავაძემ უთხრა, რომ სოფელ მაწიმში სავარაუდოდ მომდევნო ორშაბათს, 29 აპრილს ჩავლენ და ქვევრის ნამტვრევებს შემდგომი შესწავლისთვის შეაგროვებენ. ყვავაძე ჯერჯერობით ვერ ამბობს, ქვევრის დამზადების სავარაუდო თარიღს. შესწავლის შემდეგ ქვევრს მხარეთმცოდნეობის მუზეუმში გადაიტანენ. სოფელ მაწიმში აღმოჩენილი ქვევრის ნაწილი. ...