სომხეთის პრემიერ-მინისტრმა ნიკოლ ფაშინიანმა განაცხადა, რომ არ აქვს პასუხი, რატომ რჩება ქვეყანა კოლექტიური უსაფრთხოების ხელშეკრულის ორგანიზაციაში (ОДКБ). ბრიტანულ მედიასთან ინტერვიუში ფაშინიანმა თქვა, რომ ОДКБ-მ არ გამოიყენა რეაგირების მექანიზმები აზერბაიჯანის შეიარაღებული ძალების მიერ 2021 და 2022 წლებში სომხეთის საზღვრების დარღვევის დროს და განაცხადა, რომ საზღვრები დელიმიტირებული არ ყოფილა. მან აღნიშნა, რომ (ОДКБ) არ მოქმედებს როგორც მექანიზმი, რომლის იმედიც შეუძლიათ ჰქონდეთ წევრ ქვეყნებს, რუსეთს, სომხეთსა და სხვებს. „და ეს განპირობებულია ОДКБ-ს რეაქციით და ზოგი წევრი ქვეყნის განცხადებებით. ჩვენი საზოგადოება გვეუბნება, რატომ აგრძელებთ ОДКБ-ს წევრობას. გულწრფელად რომ ვთქვა, მე არ მაქვს პასუხი ამ კითხვაზე“, - განაცხადა ფაშინიანმა. მანვე აღნიშნა, რომ რუსეთი მნიშვნელოვან და სერიოზულ როლს თამაშობს სამხრეთ კავკასიის რეგიონში. ბრიტანელ ჟურნალისტებთან ინტერვიუში ფაშინიანმა ისაუბრა შეშფოთებაზე, რომელსაც იწვევს სომხეთის არმიის რეფორმებსა და მოდერნიზაციაზე აზერბაიჯანიდან წამოსული განცხადებები, შენიშნა რადიო თავისუფლების სომხურმა სამსახურმა. სომხეთის პრემიერის თქმით, არცერთ ქვეყანას არ შეუძლია იდავოს სხვა ქვეყნის უფლებაზე, ჰყავდეს ბრძოლისუნარიანი არმია. „უნდა ითქვას, რომ ბრძოლისუნარიანი არმია, დიახ, ზოგჯერ გამოიყენება ომისთვის, მაგრამ ბრძოლისუნარიანი არმია ასევე მნიშვნელოვანია მშვიდობისთვის, ძალთა სწორი ბალანსის ფორმირებისთვის“. „ჩვენ არ ვემზადებით ომისთვის, ჩვენ ვემზადებით მშვიდობისთვის. მაგრამ, მეორე მხრივ, ჩვენ არ ვართ დარწმუნებული, რომ სომხეთის რესპუბლიკას არ დაესხმებიან თავს. ბუნებრივია, ჩვენ უნდა გავაძლიეროთ თავდაცვისუნარიანობა“. ფაშინიანმა ხაზგასმით აღნიშნა, რომ სომხეთი ამჟამად შედის დემარკაციის პროცესში, რაც უაღრესად მნიშვნელოვანია, განსაკუთრებით უსაფრთხოების რისკების შემცირების თვალსაზრისით. ...